COMPASS Nunavut ᓄᓇᕗᑦ

Compass logo.

ᐊᐅᓚᓂᐅᑉ ᑕᐃᔭᐅᔾᔪᓯᖓ:

COMPASS: ᖃᓄᐃᑦᑐᑐᐃᓐᓇᕐᓂᒃ ᖃᐅᔨᓴᕐᓂᐅᔪᖅ ᕿᒥᕐᕈᓂᐅᑦᓱᓂ ᖃᓄᖅ ᐊᓯᔾᔨᕐᓂᐅᔪᑦ ᐃᓕᓐᓂᐊᕐᕕᒻᒥ ᐊᐅᓚᓂᐅᔪᓄᑦ, ᐊᑐᐊᒐᕐᓄᑦ ᐃᑲᔪᖅᓯᒍᑕᐅᔪᓪᓗ ᐊᑦᑐᐃᓂᖃᕐᒪᖔᑕ ᐅᕕᒃᑲᐃᑦ ᐋᓐᓂᐊᖃᕐᓇᕐᒨᖓᔪᓄᑦ ᐱᐅᓯᖏᓐᓄᑦ.

ᖃᐅᔨᓴᖅᑎᐅᑉ ᐊᑎᖓ ᑲᑐᔾᔨᖃᑎᖏᓪᓗ:

ᐃᓕᓯᒪᔪᕐᔪᐊᖅ ᓯᑳᑦ ᓚᖤᑎᐅᓪ, ᐃᓕᓐᓂᐊᑎᑦᓯᒻᒪᕆᐅᖃᑕᐅᔪᖅ, ᐃᓕᓐᓂᐊᕐᕕᒻᒥ ᑭᓇᒃᑯᑐᐃᓐᓇᕐᓄᑦ ᐋᓐᓂᐊᖅᑐᓕᕆᓂᕐᒥᒃ ᐊᐅᓚᓂᖏᓐᓂᓪᓗ, ᓯᓚᑦᑐᓴᕐᕕᔾᔪᐊᖓᓂ ᐅᐊᑕᓘ, ᐋᓐᑎᐅᕆᐅ, ᑲᓇᑕ

ᓇᓗᓇᐃᔭᐃᔪᖅ ᐊᐅᓚᓂᕐᒥᒃ ᐱᖃᓯᐅᑎᑦᓱᓂ ᐃᖏᕐᕋᓂᐅᒐᔭᖅᑐᖅ:

COMPASS ᑲᓇᑕᒥ ᑎᒥᐅᔪᖅ ᐋᓐᓂᐊᖅᑐᓕᕆᓂᕐᒨᖓᔪᓂᒃ ᖃᐅᔨᖅᓴᑎᐅᑦᓱᑎᒃ ᐋᓐᓂᐊᖅᑐᓕᕆᔨᒃᑯᓐᓂᓪᓗ ᑲᓇᑕᒥ ᑮᓇᐅᔭᖃᖅᑎᑕᐅᑦᓱᑎᒃ ᐋᖅᑭᑦᓯᒪᔪᓂᒃ ᖃᐅᔨᓴᕈᑕᐅᖁᔭᐅᑦᓱᑎᒃ ᐊᔾᔨᒌᓐᖏᑦᑐᓂᒃ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᓂᒃ ᑎᑭᐅᒪᔪᓄᑦ ᐊᕐᕌᒍᓄᑦ ᑕᓪᓕᒪᓄᑦ ᑐᑭᓯᐅᒪᒍᑎᒋᓂᐊᕐᓗᒋᑦ ᖃᓄᖅ ᐊᓯᔾᔨᕐᓂᐅᔪᑦ ᐃᓕᓐᓂᐊᕐᕕᒻᒥ (ᐊᑐᐊᒐᐃᑦ, ᐊᐅᓚᓂᐅᔪᑦ, ᓴᓇᒪᓂᖓ ᐊᕙᑎᐅᑉ) ᐊᑦᑐᐃᓂᖃᖅᓯᒪᒻᒪᖔᑕ ᐅᕕᒃᑲᐃᑦ ᐋᓐᓂᐊᑦᑕᐃᓕᒪᓂᕐᒧᑦ ᐱᐅᓯᖏᓐᓂᒃ. COMPASS ᑐᕌᒐᖃᖅᓯᒪᔪᑦ ᐊᑐᐃᓐᓇᐅᑎᑦᓯᒍᒪᓪᓗᑎᒃ ᐃᓕᓐᓂᐊᕐᕕᓐᓂᒃ ᑎᒍᒥᐊᖅᑐᓄᑦ ᓇᓗᓇᐃᕈᑎᑦᓴᓂᒃ ᖃᐅᔨᒪᓕᑕᑦᓴᓂᒃ ᕿᒥᕐᕈᒍᑕᐅᓗᑎᓪᓗ ᐃᓕᓐᓂᐊᕐᕕᓐᓂᒃ ᑐᓐᖓᕕᖃᖅᓱᑎᒃ ᐊᐅᓚᔾᔭᒋᐊᕈᑕᐅᔪᓂᒃ ᐊᑦᑐᐊᔪᓄᑦ ᖁᐃᓂᓗᐊᕐᓂᕐᒧᑦ, ᓂᕿᑦᓯᐊᕙᓐᓂᒃ ᓂᕆᖃᑦᑕᕐᓂᕐᒧᑦ, ᑐᐹᑭᑐᖃᑦᑕᕐᓂᕐᒧᑦ, ᐃᒥᐊᓗᖃᑦᑕᕐᓂᕐᒧᑦ ᓱᐴᖅᑐᒐᕐᓂᓪᓗ, ᐃᖃᐃᓕᓴᕐᓂᕐᒧᑦ, ᐃᕿᐊᑦᑖᖓᓂᕐᒧᑦ, ᐃᓕᓐᓂᐊᕕᒻᒧᑦ ᑲᓲᒪᓂᕐᒧᑦ, ᐱᓐᖏᔭᐃᓵᕐᓂᕐᒧᑦ ᐊᒻᒪᓗ ᐃᓕᓐᓂᐊᕈᑎᑎᒍᑦ ᐱᕙᓪᓕᐊᓂᕐᒧᑦ (ᐃᓱᒪᓕᕆᓂᕐᒨᖓᔪᖅ ᐃᓕᓐᓂᐊᕋᑦᓴᖅ ᓇᓗᓇᐃᔭᖅᑕᐅᓛᖅᑐᖅ ᐱᒋᐊᕐᓗᓂ 2017-18 ᐃᓕᓐᓂᐊᕐᓇᖓᓂ.

ᑲᑎᖅᓱᖅᑕᐅᔪᑦ COMPASS−ᑯᑦ ᖃᐅᔨᓴᕐᓂᖓᓂᒃ ᐊᑑᑎᖃᓪᓚᕆᓐᓂᐊᖅᑐᑦ ᑕᒪᒃᑮᓐᓄᑦ ᖃᐅᔨᓴᓂᕐᒧᑦ ᐊᑐᐊᒐᓕᐅᕐᓂᕐᒨᖓᔪᓄᓪᓗ. ᐊᑑᑎᖃᕐᓂᖓ COMPASS ᑕᕝᕙᐅᒌᖅᑐᓄᑦ ᐊᒻᒪᓗ ᑮᓇᐅᔭᖃᖅᑎᑕᐅᑦᓯᐊᕇᖅᓱᑎᒃ ᖃᐅᔨᓴᕐᓂᐅᔪᑦ ᓱᓇᒃᑯᑏᓪᓗ, ᐊᒻᒪᓗ ᕿᒥᕐᕈᒍᑎᑦᓴᐃᑦ ᑲᑎᖅᓱᖅᑕᐅᓯᒪᔪᑦ ᐅᖓᑖᓃᑦᑐᓂᒃ 70,000+ ᐃᓕᓐᓂᐊᖅᑏᑦ ᐃᓕᓐᓂᐊᖅᑐᑦ 100−ᖏᓐᓃᑦᑐᓂ ᐃᓕᓐᓂᐊᕐᕕᓐᓂ ᓇᒥᑐᐃᓐᓇᖅ ᐊᕕᑦᑐᖅᓯᒪᔪᓂ ᑲᓇᑕᒥ (ᐱᖃᓯᐅᑎᑦᓱᑎᒃ ᓇᒥᑐᐃᓐᓇᖅ ᐅᑭᐅᖅᑕᖅᑐᒥ). ᐅᑉᐱᕈᓱᒃᑲᑦᑕ ᑖᓐᓇ ᑐᑦᓯᕋᐅᑎ ᐊᑯᓃᖅᑐᒨᖓᔪᓂᒃ ᐊᑦᑐᐃᓂᖃᕈᓐᓇᕐᒪᑦ ᐋᓐᓂᐊᑦᑕᐃᓕᒪᓂᖏᓐᓂᒃ ᐃᓕᓐᓂᐊᖅᑏᑦ (ᓇᒻᒥᓂᖏᑦᑕᓗ) ᑕᒪᒃᑮᓐᓂ ᐃᓗᐊᓂ ᓯᓚᑖᓂᓗ ᑐᕌᒐᕆᔭᐅᓯᒪᔪᑦ ᓄᓇᓖᑦ ᐃᓕᓐᓂᐊᕐᕖ ᐱᕕᖃᖅᑎᓪᓗᒋᑦ, ᒐᕙᒪᑐᐃᑦ ᐊᓯᖏᓪᓗ ᑎᒍᒥᐊᖅᑏᑦ ᓇᓗᓇᐃᔭᕈᑎᑦᓴᓂᒃ ᐊᑐᕈᓐᓇᖅᑕᖏᓐᓂᒃ ᑲᔪᓯᑦᓯᐊᖅᑐᓂᒃ ᐊᑑᑎᓕᓐᓂᓪᓗ ᐊᑐᐊᒐᓕᐅᓕᖅᐸᑕ.

COMPASS−ᑯᑦ ᑐᑦᓯᕋᖅᓯᒪᔪᑦ ᑲᑎᖅᓱᐃᒍᒪᓪᓗᑎᒃ ᐃᓕᓐᓂᐊᕐᕕᓐᓂᒃ ᐱᒋᐊᕐᓗᑎᒃ ᐅᐱᕐᖔᖓᓂ 2017 (ᑭᖑᕐᖓᒍᑦ ᑐᑭᓯᒋᐊᕈᑎᖃᕐᓗᑎᒃ ᑲᑎᖅᓱᖅᑕᐅᓯᒪᔪᓂᒃ ᐊᕐᕌᒍᓂ ᐊᓂᒍᖅᑐᓂ, ᑕᐃᒪᐃᑦᓱᒪᑉᐸᑕ ᐃᓕᓐᓂᐊᕐᕖᑦ). ᐊᑐᓂᑦ ᐃᓕᓐᓂᐊᖅᑏᑦ ᑎᑎᕋᕐᓗᑎᒃ ᑭᐅᖃᑦᑕᕋᔭᖅᑐᑦ ᐊᐱᖅᑯᑎᓂᒃ ᐊᐱᖅᑯᑎᓕᓐᓂᒃ ᐱᐅᓯᐅᔪᓂᒃ ᐊᑦᑐᐊᓂᖃᖅᑐᓂᒃ ᐋᓐᓂᐊᖅᑐᓕᕆᓂᕐᒨᖓᔪᓂᒃ ᑕᐃᔭᐅᔪᓂᒃ ᑕᑉᐱᒃᑯᓇᓐᖓᑦ, ᐃᓕᓐᓂᐊᕕᒻᒥᓗ ᐊᖓᔪᖅᑳᖅ ᑭᐅᒪᒐᔭᕐᒥᔪᖅ ᐊᐱᖅᑯᑎᓂᒃ ᐃᓕᓐᓂᐊᕕᒻᒥ ᐊᑐᐊᒐᐃᑦ ᒥᑦᓴᐃᓐᓄᑦ ᐱᐅᓯᐅᕙᑦᑐᓪᓗ ᐋᓐᓂᐊᖅᑐᓕᕆᓂᕐᒨᖓᔪᑦ.  COMPASS−ᑯᓐᓂ ᐃᖅᑲᓇᐃᔭᖅᑎᒥᒃ ᓇᔫᑎᔪᖃᕋᔭᖅᑐᖅ ᑲᑎᖅᓱᐃᔪᖃᖅᑎᓪᓗᒍ ᐃᑲᔪᕐᓗᓂ ᐊᑐᓕᖅᑎᑕᐅᓂᖏᓐᓂᒃ ᑎᑎᕋᖅᑕᐅᕙᓪᓕᐊᓗᑎᓪᓗ ᑕᑯᓐᓈᖅᑕᐅᔪᑦ ᓴᓇᔭᐅᓯᒪᔪᒥ ᐊᑎᒥ ᐃᓕᓐᓂᐊᕐᕕᐅᓪᓗ ᐊᕙᑖᓂ ᑕᐃᒫᒃ ᐊᑦᑐᐊᓂᖃᕐᒪᑦ ᐃᓕᓐᓂᐊᖅᑎᐅᑉ ᐋᓐᓂᐊᑦᑕᐃᓕᒪᓂᖓᓄᑦ (ᓲᕐᓗ ᐃᖃᐃᓕᓴᕐᕖᑦ), ᐅᖃᖃᑎᒌᒍᑎᖃᕐᓗᑎᓪᓗ ᖃᐅᔨᓴᕐᓂᐅᔪᒥᒃ ᐃᓕᓐᓂᐊᑎᑦᓯᔨᓄᑦ, ᐊᐅᓚᑦᓯᔨᓄᑦ, ᐃᓕᓐᓂᐊᖅᑎᓄᑦ ᓄᓇᓕᓕᓐᓄᓪᓗ ᕿᒥᕐᕈᓗᑎᒃ ᖃᓄᖅ COMPASS ᐊᑑᑎᖃᑦᓯᐊᓲᖑᒻᒪᖔᖅ ᓄᓇᓕᓐᓂ ᓄᓇᕗᒻᒥ ᖃᓄᐃᑦᑐᓂᓪᓗ ᐊᓯᔾᔨᕐᓂᐅᔪᓂᒃ ᑕᑯᒍᒪᔪᖃᕋᔭᕐᒪᖔᖅ ᓯᕗᓂᑦᑎᓐᓂ. COMPASS−ᑯᑦ ᐊᑐᓲᑦ ᐃᖏᕐᕋᒌᖅᑐᓂᒃ ᑐᓴᕋᑦᓴᓂᒃ / ᐊᖏᖅᑕᐅᔾᔪᑎᓄᑦ ᒪᓕᖓᕐᓂᒃ ᐊᑐᐃᓐᓇᐅᑎᑦᓯᕙᑦᓱᑎᒃ ᐃᓕᓐᓂᐊᕐᕕᓐᓄᑦ ᑐᓴᕋᑦᓴᓂᒃ ᑐᓴᖅᑕᐅᑎᑕᐅᓂᐊᖅᑐᓂᒃ ᐊᖓᔪᖅᑳᕆᔭᐅᔪᓄᑦ (ᖃᓄᑐᐃᓐᓇᖅ ᐊᖓᔪᖅᑳᕆᔭᐅᔪᑦ ᑐᓴᖅᑎᑕᐅᒍᑎᒋᒐᔪᑦᑕᖏᓐᓂᒃ ᐊᑐᕐᓗᑎᒃ) ᑐᕋᐃᓐᓇᖅᑐᒥᒃ ᑐᓴᐅᒪᑎᑕᐅᓂᐊᕐᒪᑕ ᖃᐅᔨᓴᕐᓂᕐᒧᑦ ᐃᓗᓕᕆᔭᐅᔪᓂᒃ ᖃᓄᖅᑑᕈᑎᑦᓴᓂᒃ ᕿᑐᕐᖓᖓ ᐃᓚᐅᔪᑦᓴᐅᒻᒪᖔᖅ (ᑕᐃᒪᐃᓕᖓᑎᓪᓗᒍ COMPASS−ᑯᑦ ᐃᖅᑲᓇᐃᔭᖅᑎᖏᑦ ᐊᑐᕆᐊᖃᓚᐅᖅᓯᔾᔮᓐᖏᑦᑐᑦ ᐃᓕᓐᓂᐊᖅᑏᑦ ᐊᑎᖏᓐᓂᒃ, ᑲᓱᖅᑎᑕᐅᓚᐅᖅᓯᒪᖁᓇᒋᑦ ᑲᑎᖅᓱᖅᓯᒪᔪᓄᑦ). ᐊᖓᔪᖅᑳᕆᔭᐅᔪᑦ ᐃᓚᐅᖁᔨᓐᖏᑦᑐᑦ ᕿᑐᕐᖓᒥᓐᓂᒃ ᐃᓕᓐᓂᐊᕕᒻᒧᑦ ᖃᐅᔨᒃᑲᐃᒐᔭᖅᑐᑦ ᕿᑐᕐᖓᒥᓂᒃ ᐲᖅᑕᐅᖁᔨᓗᑎᒃ ᖃᐅᔨᓴᕐᓂᕐᒥᒃ. ᐊᕐᕌᒍᒥ ᐃᓚᐅᑎᕐᕕᐅᔪᒥ, ᐊᑐᓂᑦ ᐃᓕᓐᓂᐊᕐᕖᑦ ᐱᑎᑕᐅᕙᓐᓂᐊᖅᑐᑦ ᑐᓴᕆᐊᕈᑎᓂᒃ ᐅᓂᒃᑳᓕᐅᕐᕕᓐᓂᒃ ᐃᓕᓐᓂᐊᕐᕕᒻᒥ ᖃᐅᔨᔭᐅᔪᓂᒃ, ᐃᑲᔪᖅᑐᖅᑕᐅᓗᑎᒃ COMPASS−ᑯᓐᓂᒃ ᑐᑭᓯᒃᑲᓐᓂᖁᓪᓗᒋᑦ ᖃᓄᐃᒋᐊᕈᑎᖃᕐᓗᑎᓪᓗ ᖃᐅᔨᔭᐅᔪᓂᒃ, $250−ᒥᓪᓗ ᐃᓚᐅᔾᔪᓯᐊᕐᓗᑎᒃ.

ᐅᓇ ᖃᐅᔨᓴᕐᓂᐅᔪᖅ ᐊᖏᖅᑕᐅᓯᒪᑦᓯᐊᖅᑐᖅ ᓯᓚᑦᑐᓴᕐᕕᔾᔪᐊᖓᑕ ᐅᐊᑕᓘ ᐊᓪᓚᕝᕕᖓᓐᓂᒃ ᖃᐅᔨᓴᖅᑐᓕᕆᔨᒃᑯᑦ.

Top